آخر اخباري

كان المشاوير غلطه شوفتك عذري
والعشق كانه غلط بعيونك أعذاري
تحبني بس لو تدري مهو كثري
إسمك طواني غلا وإستوطن أقداري
من أول العام وأنت بخافقي تطري
قلي أجل كيف أبرجع وأنت مشواري
تقول الأشواق نار ومحرقه صدري
وش قولتك لو تحس شوي في ناري
ياصاحبي والغلا ماهو على خبري
الله من أيام راحت مالها طاري
بدري على البعد وعلوم الجفا بدري
توي معك ماوصلت لأول دياري
الطاري اللي يجي في غيبتك يغري
تطري متى مانسيتك حي هالطاري
وش حاجتي بالعمر لا ضيّعك عمري
سولف مدامك عن أسباب الزعل داري
أخبر بعض البشر لا باع ما يشري
بس أنت ماهقوتي بايع ولا شاري
أسقيت الأيام صبري مانفع صبري
شفني زبنت البحر من لجة أسراري
ياالله عسى بس عندك مانقص قدري
وإلا المصايب تراي لشيلها ضاري
جربت مره بغيرك ينشغل فكري
لقيتك اللي طرى في زحمة أفكاري
وإن كان تنشد عن أخباري ولا تدري
بس القصايد وطيفك آخر أخباري

عطالله فرحان

Leave A Reply

Your email address will not be published.