الشيخة الزين وسبتمبر التربية !

0

محمد خلف

صباحكو فل وياسمين ياجماعة الربع ،النهرده أنا عندي موضوعين متناقضين يارب نتشاركو فيه .قالها الخبير ثم أضاف :الاول قمة بالتضحية والتواضع وهو عن استقالة وكيل وزارة الدولة لشؤون الشباب الشيخة الزين الصباح من منصبها بعد خمس سنوات من العمل والمسؤولية الحكومية . وقالت بكتاب الاستقالة بانه آن الاوان لأسلّم الأمانة إلى زملائي . أما الموضوع الثاني فهو عاوز طولة بال وهدوء وعدم التسرع والاندفاع فيه من حضراتكم ،
وجاء تحت عنوان بارز وهو مابين قوسين كبار (سبتمبر شهر الصداع في رأس التربية، ومطالبة بتأجيل الدراسة بسب النقص بالمعلمين والأثاث والكتب !. ) وهو موال كل سنة وبنجاح منقطع النظير .
الشايب : حي هالوجه ، عزالله طلعت اخت رجال بقرارها الزين ، ياليت بعض هالزلم المعششة بمناصبها يتعلمون منها وخصوصا قياديي وزارة التربية اللي كل بداية سنه دراسية نفس المشاكل ومع هذا مستمرين بمناصبهم دون تحمل مسؤولية فشلهم .
المعاق : المنصب ياحجي عزيز وغالي عليهم لان البعض منهم بذل الغالي والنفيس بسبيل الوصول له ،وانت بكل سهولة وببساطة تبيهم يستقيلون ؟ لو هم حاسين او عارفين ان احد يراقب عملهم جان تسنعت أمور كل وزارات الدولة بس وش نقول غير : لابارك الله بالكسل والتهاون .
الرجل : وازيدكم من الشعر بيت،فوق كل هالمشاكل بعض المدارس صفوفها مافيها تكييف لانها عطلانة ، وحتى برادات الماي خربانة ! واعرف مدرسة ابتدائية كيربي ساحة الطابور طايح من العام ولا احد فكر يصلحه مع ان العطلة كانت طويلة وكان بالإمكان إنجاز كل النواقص ،بس فعلا صدق من قال : من أمن العقوبة اساء الأدب .
الشاب : وحسب مصادر خاصة بعد اعلان مدير وحدة من المناطق التعليمية جاهزية مدارس منطقتة واستعدادها لاستقبال الطلبة ، اتصل ببعض المدارس لتأجيل حضور الطلبة بعد أسبوع حتى تستكمل النواقص ! وأوصاهم بان يكون هالموضوع سري لانه من الصعب اعلان التأجيل بسبب إعلانه جاهزية مدارس منطقته .وأبشركم جاني “واتساب “بأن تأجيل الأسبوع تعمم رسمي .
الخبير : والله عجيب امر المدارس .الا بجد هما ليه مايعملوش الإصلاحات بالعطلة الصيفية ؟ او على الأقل خلال انتهاء الدراسة وقبل ما الهيئة التدريسية تأخذ إجازتها ؟
الشايب : ياخبير، السالفة ومافيها هو الحرص على العمل وحب الانتاج، وياليت كل المسؤولين يتعلمون من الشيخة الزين حب الكويت اولا والعمل ثانيا .
ومن هذه الديوانية أطالب بمحاسبة كل مسؤول مقصر بعمله ،دام الواحد منهم ماعنده دم يستقيل مع تكرار الفشل ودمتم سالمين .
المتمولس : أنا الصراحة مو زعلان لأن “نت فيفا” وقف خمس ساعات ، زعلان لان بعد ما اشتغل مالقيت احد مكلمني ! وفي هذه الاثناء رفع الشيخ زغلول على مسامعنا اذان الظهر .

كاتب كويتي

You might also like

Leave A Reply

Your email address will not be published.

تسعة عشر + 9 =