الكبار كبار

عمـر المطـر ماقلت له ماجور
لين اقتنعت ان الرجال أشجار
وأن القلوب اللي بدون شعور
مثل الغصون اللي بدون أثمار
حتى لو أنها فالتراب أدور
ماراح تعطيها ولا مقدار
من غبةً وَحدة هل البابور
يستخرجون اللولو والمحار
هذا يزين من غلاه الحور
وهذاك مايسوى ولا دينار
مافي شي الا ولحقه قصور
حتى السنين التاليات قصار
وتكون الأرض من الأوادم بور
ماهو عشان القبور كثار
اللي دفناهم بدون قبور
أكثر من الموتى بتسع أعشار
ماعاد في بعض الرجال صدور
من يوم أكلها الحسد ياستار
خلوا البنات أم العيون الحور
أثر الرجال من الرجال يغار
النور من يقدر يحجب النور
ياللي تحسب أن النجوم صغار
لا صار ماميزتها معذور
ماني بقايلك وشو اللي صار
وش ذنبي إن كان العيون العور
ماتقدر تشوف الكبار كبار
حتى ايش تشهد شهادة زور
وتحط راعي البيت مثل الايجار
ماجيت أبي ذكرك وأنا مذكور
لو ماني بشاعر مع الشعار
أبوي قدامي خذاله دور
ماشغل فلوسه مع التجار
يلمها ويحطها بقدور
ويشب من حدر القدور نار

الشاعر يوسف العصيمي