اليوم الطويل

عبدالله علوش

سجلونى من هواة المستشار
من عقب ما قصر اليوم الطويل
كلمتني مي والدنيا نهار
دلهتني لين صار الوقت ليل
قالت الدنيا تجارب واختبار
ناجحٍ فيها من الناس القليل
باسألك عن شي صار شلون صار
كذب جيل يصدقه خمسين جيل
قلت هاتي الاسئلة يوم استدار
فكري وعزم على بدع الجزيل
قالت أصعب شي قلت الانتظار
لكن أسهل شي هو المستحيل
قالت أكذب شي قلت الافتخار
لكن أصدق شي تاريخ ودليل
قالت أطيب شي قلت الانتصار
لكن أردى شي دمعات الذليل
قالت أكرم شى قلت الاعتذار
لكن أحقر شي نكران الجميل
قالت أذكى شي قلت الاعتبار
لكن أغبى شي تدريس الهبيل
قالت أفضل شي قلت الابتكار
لكن أتفه شي تقليد الاصيل
وانا وياها الين الوقت طار
في الكلام الذرب والخلق النبيل
عقب قالت ذكر أجيال الصغار
ان ما عكس الجزيل الا الهزيل
والفضل لله ثم للمستشار
والا بيني وبينها حول ألف ميل