عرفه وجيه

يا كثرهم لا قلت لك عرفة وجيه
وياقلهم لا قلت قـدر ومعـزه
رجل تعزه بعد ماتلتقـي فيـه
ورجلٍ قبل ماتلتقي بـه تعـزه
ورجلٍ ترزه بالمجالـس مباديـه
ورجلٍ فلوسه بالمجالـس تـرزه
ورجلٍ يموت ولا يجيبون طاريـه
ورجل ٍ يجي طاريه في كل حـزه
ورجلٍ يهزه بعض موقف ويشقيه
ورجلٍ مهوب أيّات موقف يهـزه
ورجلٍ ضعيف ويستفزه معاديه
ورجلٍ كـلام اعـداه مايستفـزه
ورجلٍ تلزه يعترف لك بخافيه
ورجلٍ على خافيه محدٍ يلـزه
ورجلٍ يوزونه ويزعل بنيخيـه
ورجلٍ يزعّل من يحاول يـوزه
ورجـلٍ تكـزه لا زم انـك توصيـه
ورجلٍ بليّا ما توصيـه كـزه
من لا فـرش للمرجلـه ماتغطيـه
ومن لايخز الناس محدٍ يخـزه
ان كنت تعرفني فهي عرفة وجيه
مو شرط لك بالقلب قدر ومعـزه

خلف مشعان