عزيزي الفقراوي: “ماشفت شي”…!

0 156

محمد خلف

“الا يا حاج اخبار صاحبك العيان ابومتعب ايه، بقالي زمان ما سمعتش عنه حاجه بعد ماطلع من المستشفى”؟ قالها الخبير، ثم أضاف:” أنا فاكر انك قلت ان بتوع المستشفى قالوا له بعد أسبوع من الرقاد عندهم بأنهم مش لقيين سرير فاضي لجناب حضرته بمستشفى الصدري عشان يعمل قسطرة”.
الشايب:” كل خير هذا هو على حطت يدك من طلعته من المستشفى لا جديد بحياته، ماغير رايح راد بين غسيل الكلي ومقابل غنمه بانتظار موعد القسطرة”!
المعاق:” معقول هالكلام أنا اذا ماني غلطان من طلعته من المستشفى لليوم صار له شهر ونص، هو وش ناطر الله يهديه وش هالكسل اللي عايش فيه”؟
الشايب:” الأمور ماهي بيده، أهل المستشفى يقولون ان ماعندهم سرير فاضي من كثر المرضى اللي يراجعونهم، ولهذا عطوه استمارة الخروج حتى يدبر هو بنفسه موعد”.
الشاب:” معقولة هالكلام، بلد غني مثل الكويت المرضى فيه مواعيدهم شهور، لا ومدوخين المرضى اللي يقدمون على العلاج بالخارج بحجة ان علاجهم متوفر”طل” بالكويت، وين مخافة الله بالمريض يا مسؤولين وزارة الصحة، هو لو انه من احد هالمعروفين جان طيروه بطايرة اخلاء طبي مثل عادتهم بالناس اللي راضيين عنهم”؟
الشايب:” المسكين ما خلى احد ما طل بوجهه عشان يقرب له الموعد”!
الرجل:” الحل عندي وانا يا محاجيكم دايم استعمله، أقول الله لا يهينه خله يرخي الدينار وأمره يتسنع”!
الخبير:” ايه اللي انت بتقوله ده، هو انت فاكر نفسك بمصر، اصحى للون يا راجل، ده كلام كبير اوي… اوي، وانا اسمح لي بأشك بذلك، معقوله ده بيحدث بالكويت”؟
الرجل:” صلوا على الحبيب (الجميع اللهم صَل وسلم عليه) اللي حصل لصاحب الحجي، حصل معاي لواحد من أهل بيتي، بغيت موعد لإجراء قسطرة له، حفت رجلي ورجل اللي اتشدد بهم ولا حصلته، وبيوم وانا حاير بهالموضوع قال لي صديق جرب روح لعيادة واحد من دكاترة المستشفى الخاصة، وأمورك تتسنع، فعلا بثاني يوم رحت لواحد منهم وعملنا تحاليل، وأخذنا علاجات كلفتنا حوالي ثلاث مية دينار، ومع ثاني مراجعة عنده دبر لي موعد القسطرة بعد ثلاث ايام بس، وبكل بساطة، ولهذا ياليت تقول لصاحبك ياحجي يختصر الموضوع بانه يسوي مثل ما سويت، وأموره تخلص أسرع من السريع، بلا مواعيد طويلة، ودبلة جبد، وان كان ما عنده قريشات يروح يتسلف لان العمر ما يتعوض، وازيدكم من الشعر عماره، ان من بعد هذه الحادثة صرت من ابغى مستشفى معين بالكويت اروح لعيادة واحد من دكاترته الخاصة، وأموري تسلك بلا دوخة بطاقتك المدنية ماهي على المستشفى روح راجع مستشفى منطقتك”.
الشايب:” هذي وصفة سهلة، وملعون ابو الفلوس جدام الصحة، بس وهذي حط حدرها مليون خط، ليش حنا يالمواطنين اللي على قد حالنا نشوف العذابين بمراجعاتنا بكل دواير الحكومة، مادري حنا مواطنين باي دولة حنا”؟
المتمولس:” نصيحة اقدمها لكم بالمجان، يالربع الموظفة اللي ماتخلص معاملتك وانت طالع قولها مشكورة خالتي…وفي هذه الاثناء رفع الشيخ زغلول على مسامعنا اذان الظهر”.
كاتب كويتي

You might also like