في الكويت فقط تقدر تفتح مكتب محاماة بشهادة ام يوم

0 4

محمد خلف الشمري

المعاق: في الكويت فقط ماتدري من وين تجيك الاتصالات المزعجة! مرة من ناس تقولك الف الف مبروك ربحت معانا كم الف دينار (متى)؟ ومرة يجيك اتصال من ساحر! ومرة يجيك اتصال بالصلاة على النبي ابسط ياعم ربحت معانا تذكرة بعد ان طلع رقم تليفونك بالسحب الاسبوعي اللي بتعمله شركتا! وكل اللي عليك هو الحضور لمقر الشركة انت والمدام واستلام الجائزة! وأول ماتوصل يعرضون عليك بضاعتهم ويحرجونك امام ام العيال وياكثر اللي تدبسوا بشقق خارج الكويت من ام أسبوع سكن بسبب فوزك بتذكرة لك وللمدام ! وهذا حالنا يوميا بكل وقت يجيك اتصال بشغله جديدة! وآخر الاتصالات عن دورة محكم دولي ام يوم وبمبلغ كبير ! وللاسف طاح فيها الكثير من الناس اللي قال لهم المتصل انه بامكانكم بهالشهادة فتح مكتب محاماة!
الشاب: في الكويت فقط فيه معاناة ما تجينا الا اخر الليل وبعز النوم، وهي للاسف مع سيارات النظافة، اعزكم الله، اللي تلف على البيوت ! هالسيارة المزعجة اول ماتدخل الشارع يبدأ ازعاجها من أصوات عمالها وهرنات سيارتهم بحثا عن راعي سيارة مضيق الشارع على سيارتهم، هذا غير طقطقة البيبان بحثا عنه ! والله الواحد مايدري من وين يلقاها، هو من ضيق الشوارع وزحمة الجيران او من قل مصافط السيارات او من عمال البلدية ؟ ودام الكلام عن سيارات البلدية أنا عندي سوْال: ليش سيارات النظافة كلها مثل مثل ام السبع أمتار وأكثر ؟ هم ليش مايشترطون على اللي ترسي عليه المناقصة انه يجيب سيارات اكثر مرونة وأصغر حجم للمناطق المزدحمة؟ لان بعض المناطق زحمتها غير طبيعية، ومنا الي من يهمه الامر.
الشايب: في الكويت فقط نسمع عن هدايا ومنح مالية (ميخالف حلو تلميع اسم الكويت) وقروض ميسرة وتنشيط لاستثمارات بعض الدول تقوم بها الحكومة مشكورة. وبالوقت نفسه نسمع عن مشاكل لمواطنين منهارين (اشعلينا منهم) أكلهم القمل من كثر ديونهم! وللاسف المجلس والحكومة عاجزون عن حل مشاكلهم مع ان حل مشاكلهم ينشط القوة الشرائية والتجارية بالبلد.
الرجل: في الكويت فقط أصبح للبورصة مفهوم ثان بعد ان احتكرت لفئة معينة استخدمتها كاداة لسحق الفئة اللي اقل منها. وكأن هدفهم ومنى عيونهم جعلها تعيش على الراتب بس دون التفكير بمدخول اخر يساعدهم على غلاء المعيشة اللي ضارب اطنابه بالكويت من كم سنة. واللي يزيدك قهر تخاذل البعض من المسؤولين من اللي يهمهم الامر.
الخبير: في الكويت فقط الشعب اصبح تسعين بالمية منهم عبارة عن ساسه وسياسيين فاهمين كل شي. وأما العشرة بالمية الباقية منهم هي للتنمية والترفيه واحباط التسعين بالمية.
المتمولس: امس كتبت بغوغل ماذا تريد المرأة ؟جاوبني غوغل وقال: الله معاك وانا بعد مثلك أدور الإجابة. وفي هذه الاثناء رفع على مسامعنا الشيخ زغلول اذان الظهر.
كاتب كويتي

You might also like

Leave A Reply

Your email address will not be published.