لها هراج

يطول الحديث وكل كلمة لها هراج
فناجيل جرح الوقت ياوقت مشروبه
تدف الهبايب ضيقة الصدر للمخراج
لو ان الحزن مغرق ثرى القلب منسوبه
ما عمر الليال قدرة ضيقة المحتاج
يعيش الفقير وراس ماله معه ثوبه
ولو ان الزمان الشين بيرٍ مثل هداج
لقيته هماجٍ يوجع الكبد مشروبه
غدينا هل الكوفة ووقت الردى الحجاج
يموت الوفا وحقوق الأجواد مسلوبه
زمنا على طمس الحقيقة فقيد علاج
يخلي الشقي يمشي على راس عرقوبه
صحاري السنين اتدحرج امالنا دحراج
يا عزي لقلبي من زمانه ولاهوبه
اعن الركايب واقطع الليل دون سراج
غريمن يحب الموت لعيون رعبوبه
ياكبدي من الدنيا وموجن عليها هاج
علي الحرام ان فلا ادري شـ انا صوبه
لعب بي رغاب الوقت واصبر على المطناج
عساي اتقرب من طموحي وماجوبه
ترى ما عرف قدر المهادي سوى فراج
لكن فالزمن ذا كلمة الحق معيوبه
يا وقت السموحة منك واسف على الازعاج
لكني طلبتك تسمع القول لو نوبه
سيوف الصراحه سجنها ما عليه افراج
لأن الصراحه يازمن غير مرغوبه
انمثل بطولة فيلم لكن بدون اخراج
وقصة سيناريو الفيلم ماهيب مكتوبه
تضيع الحقايق بين فكرة وبين انتاج
ورؤية جروح الوقت في وسط غيبوبه
خطا المرء وارد والخطا ما عليه احراج
لكن غلطة الشاطر اليا جات محسوبه
يا قلبي اعزك وارفعك والحشيمة تاج
مدام ان فناجيل المخاسير مشروبه
طموح الأمل نظرة وجفن الحياة سياج
واذا جيت ارقع هفوة الوقت وش هوبه
انا كيف اضيق من الزمن وإلا ليه احتاج
وانا مري وربعي هل العز ودروبه
اليا قالوا اني من قطر ضيقتي تنباج
بلاد التميمي والمواقيف تسمو به
انا البحر والريح الشقا والهموم امواج
تعصف الرياح وطبعه اياه واسلوبه
يا عزمي عليك الله سر للظلام سراج
وش الراس ما غدا المجد مطلوبه

حمد البريدي