مات الغلا

مات الغلا في قلبي المغرم عقب ذاك الطموح
مرحوم يا قلب ٍ خذاه الحب في لحظة وغاب
احترت انا في ما جرالي وين اولي وين اروح
معاد باقي في محاني القلب شرهات وعتاب
جوي تعكر والغموض اجتاحني عقب الوضوح
عزي لحالن تطرق اهموم الشقا ألفين باب
لا بالسما قمره ولا نجمة ولا برقن يلوح
ولا في دروبي غير ضيعات النظر وسط الضباب
ولا برتحالي مع سنين الهم ميلات ونزوح
ولا لي مع ايام الفرح يا كود صفحة في كتاب
ولا بالليالي الماضيه غير المواجع والجروح
ولا للعمر لذه وانا مازلت في سن الشباب
هذا انا والله ما يحتاج في سرك تبوح
يعني علشاني هويتك زدت في قلبي صواب
طيب سؤالين احترق قلبي على جمرن يفوح
عطني اجابه عقبها لا رحت مابحسب حساب
منهو هذاك اللي مخلي قلبك العاني شفوح
وش ميزته والله خلقنا كلبونا من تراب !
وشلون خلا عينك النجلا على ذكره تنوح
وقلبك عقب فرقاه باليه التوجد والعذاب
وليه القدر جابك تعيش الدور في عالي الصروح
مثلت لي بالكذب قصة حب والواقع سراب!
جاوب ورح ما دام مات الحب يا ذاك الطموح
ولا رحت ابنسى نزوة الاحلام مع طول الغياب

مساعد السوارج

Print Friendly