محبتك خيرة

ماهو بكيفك تواصلني تقطعني
اما غلا بين او فضها سيره
ياشين لاجيت تقطع لاتوادعني
ليتك تحس الوداع شلون تأثيره
ياماخذ الحب قل فيني وسمعني
حب على كبر صعب ابدل بغيره
أبحتفظ فيك وادري مانت نافعني
يمكن مع الوقت اقول محبتك خيره
والله تدري وش اللي معك دافعني
اني معاك انت امارس آخر الغيره
واحب فيك البرود اللي يقاطعني
لو ماتكلمت صمتك صعب تفسيره
ياللي عليك البشر شفها تقاطعني
منين ماوجه الهقوات لك سيره
ياشينها من الخوي قولتك قاطعني
ماغير شره ولا انت بشايفن خيره
ياشينها منك لاجيتك توزعني
في عذرك اللي على هالظرف تجيره
شف كبر صبر البشر ماعاد يوسعني
واكبر هموم العباد اشوفها صغيره
وش جاك مني خطا يومك تبيعني
في سوق ذقها عليك اسوقها جيره
انا اذكر انك الا من قلت دلعني
القلب هانت علشانك مشاويره
يامشغلن القلب بين تحبني ويعني
شي يقول أعذره واقبل معاذيره
قلت احتفظ فيك وادري مانت نافعني
يمكن مع الوقت اقول محبتك خيره

حمد السعيد