مطلب شعبي مهم!

0 240

محمد خلف

“أيفون ابو الشباب ملعلع حده بأغنية، اخر طرب، راشد الماجد “تـطـلـبــوني شـي… منـي وش تـبــون… بـس انتـوا ما لكـم فينـي شـغـل… إيــه أحبــه لا وحـبــي لــه جـنــون… و اللي يمنعني ترى مالـه أمــل”!
الخبير:” خير اللهم اجعله خير، ايه سيمفونية الطرب اللي انت عاملها اليوم”؟
الشاب: ومنين يجي الخير يا سعادته، اللي انت تسمعه اهداء خَص نص من ابو الشباب لكل المواطنين بالكويت نَفَر نَفَر ونفرة نفرة، والله شي يحير الشعب لهم 323 يوما بهشتاغ “إسقاط القروض” اللي كسرت ظهورهم، واثناء مدة الهشتاغ كل يوم والثاني يطّلع لك واحد من الوزراء يقول:”شسالفة”؟ الاحتياطي العام في الرمق الاخير( ما دري نعطيه جغمة ماء)؟ وثاني يوم (على الأقل نطروا أسبوع) من تصريحه تجيك المطمه الكبيرة بإعطاء دولة ما مساعدات مليارية (للعلم حنا في نظر العالم البقره الحلوب)، مادري هل هو تحدي صارخ فاضح (أشق هدومي واركض بالشارع بشورت وكاب؟) لشعب مغلوب على أمره، ام طناش ثلاثي الأبعاد، والرابع دخل”؟
الشايب:” هونها وهي تهون، وياعل من لامك يأكل فشار على رأي معتز مطر، كلنا بالهوا سوا يا بوك اللي تعاني منه اعانييه انا وعيالي، للاسف، موظفين (بؤساء لكن نتجمل) على الطل كل معاشاتنا ديون بديون ناخذ من هذا، ونحط بحلق هذاك، لنا سنين طويلة نسأل الله الفرج لنا ولكم اجمعين”.
الرجل:” من ديوانيتنا الموقرة أطالب برحيل (دام الشعب ساكت) الحكومة مع مجلسنا الصامت (يمكن قضية دخول المجلس اهم من المطالبات بإسقاط القروض)؟ لان نوابه صاروا ضد الأمة، لان ماهو معقول سكوتهم على الوضع المادي للمواطنين اللي كل يوم بعوز، وعلاوه (واحشانا) على تغميضة عيونهم عن فساد مرعب بالبلد بكل المجالات (عد وخربط)”!
المعاق:” الله يكون بالعون، ونصيحتي اذا تبونها تسقط وتبون الحياة الكريمة، عليكم بساحة الإرادة لانها هي الحل الوحيد وسلامتكم، وتـطـلـبــوني شـي…منـي وش تـبــون…بـس انتـوا ما لكـم فينـي شـغـل(ولسان طالع لنا)”!
المتمولس:” كنت اسولف وقلت اسمك بالغلط احسبني يالغالي جالس معاك، واللي سمعني ضحك ثم قال بعبط اسلم اسلم دام محد يسمعك”؟ وفي هذه الاثناء رفع على مسامعنا الشيخ زغلول اذان الظهر.

كاتب كويتي

You might also like