ميت ضما

عشقت غيداً سمّحتني عن الغيد
أقول والا بس مانيب قايل
ميّت ضما والعد صعب المواريد
وبذلت من شانه جميع الوسايل
والشربه اللي من حياض الأجاويد
تقطع ضما هدف الضلوع النحايل
يانووووف جيتك من ورا نازح البيد
بالراس مايحتاج رد الرسايل
وأن كان ماضمّدتي الجرح تضّميد
تحمّلي شرهة عيال الحمايل !!
أنا دخيل الصدر والثغر والجيد
أرخي علي شلال شقر الجدايل !!
هذي تكفيني من العيد للعيد
وأنا علي يانوووف رد الجمايل
أحظنك بأشواقي !! من الإيد للإيد
وشعرك على هاك المبيسم تمايل
ياقوم يامبسم نجاح المساعيد
أنتي مثل تضرب عليه المثايل
حبّي وحبّك حب عليا وأبو زيد
والا مثل حب الطنايا لحايل !!

سلطان الهاجري